Bodaboda 107 Wamikili Pikipiki

Waziri wa Mambo ya ndani Mhe. Mwigulu Nchemba,akimkabidhi bwana Peter Urio kadi ya Pikipiki,Mkoani Arusha.

Waendesha bodaboda mkoani Arusha wapewa miezi mitatu kuhakikisha wanajifunza sheria na taratibu za barabara bila kusumbuliwa na polisi wa barabarani.

Akitoa kauli hiyo,Waziri wa mambo ya ndani mheshimiwa Mwigulu Nchemba katika kikao chake na waendesha bodaboda wa mkoa wa Arusha alipokuwa akiwagawia kadi za umili wa bodaboda  kwa madereva 107 waliofanikiwa kumaliza mkopo wa mradi wakukopesha pikipiki ulioanzishwa na Mkuu wa Mkoa wa Arusha.

Kauli hiyo imetolewa na mheshimiwa waziri baada ya Mkuu wa Mkoa wa Arusha kutoa ombi maalum kwake lakuwaruhusu madereva bodaboda hao kujifunza sheria kwanza kisha ndio polisi waanze utaratibu wakuwakamata wale wote watakaokuwa wamekiuka sheria za barabarani.

Mwigulu Nchemba amewasihi bodaboda wote nchini kuchukulia hii kazi kama yenye heshima ili iweze kuwabadilisha maisha yao na tegemeze wao.

Aidha,amesisitiza utoaji wa leseni kwa bodaboda utazingatia kwa wale ambao watakuwa wanamiliki kofia mbele na hata akiwa na cheti pia atapatiwa leseni,pia abiria atakaekaidi kuvaa kofia basi atapatiwa adhabu yeye nasio dereva kama ilivyokuwa awali.

Akichangia zaidi juu ya mradi huu,Mwiguli Nchemba atachangia kiasi cha shilingi milioni 10 ilikusaidia vijana wengine waweze kukopeshwa pikipiki kwa wingi.

Pia, Mkuu wa Mkoa wa Arusha Mrisho Gambo,amewaambia bodaboda kuwa wanaweza kutumika katika kubeba watalii ikiwa tu wataweza kufuata sheria na taratibu za barabarani.

Amewapongeza watendaji kata na maafisa tarafa wa Jiji la Arusha kwakuonyesha ushirkiano mkubwa katika kufanikisha makusanyo na kwa wakati, na kiasi cha shilingi milioni 306 tayari zimesharudishwa na milioni 200 zitatumika kukopesha wamama wajasiriamali wadogo kwa mkopo wa shilingi laki 2 kwa wamama 500.

Amesema kiasi cha pesa kinachobaki cha zaidi ya milioni 100 kitatumika kukopesha waendesha bodaboda wengine,hii itasaidia kuwawezesha vijana wengi kumuliki pikipiki zao wenyewe badala yakutegemea pikipiki za watu wengine ambazo zinawabana sana.

Kamanda wa polisi kitengo cha barabarani Joseph Buberwa,amewataka bodaboda kuhakikisha wanatii sheria bila shuruti,wapunguze spidi barabarani hususani kwenye makazi ya watu.

Amesema kuwa polisi barabarani hawatawakamata bodaboda ambao hawana leseni lakini wana cheti cha udereva na watawapa mda wakuhakikisha wanapata lesenina amewapongeza madereva 250 waliofanikiwa kuhitimu mafunzo ya udereva.

Akisisitiza zaidi mwenyekiti waumoja wa madereva bodaboda (UBOJA) bwana Mauridi Makongoro,amesema mradi huo umewanufaisha sana bodaboda wengi kwani umewatoa katika mazingira yakuendesha bodaboda za watu wengine na sasa wanamiliki zao wenyewe na wameweza kuingiza kipato chakutosha.

Mradi huu ulianzishwa mwaka 2017 na mheshimiwa Gambo kwa lengo lakuwakwamua bodaboda wa Jiji la Arusha katika changamoto yakukosa mtaji wakumiliki pikipiki zao, vijana 200 walifanikiwa kukopeshwa pikipiki hizo na kati yao 107 wamemaliza mkopo nakukabidhiwakadi za umiliki wa pikipiki na wengine wanaendelea na marejesho.

Waziri wa Mambo ya Ndani Mwigulu Nchemba,akiwa kwenye picha ya pamoja,kulia ni Mkuu wa Mkoa wa Arusha Mrisho Gambo,viongozi wa CCM Wilaya ya Arusha na bodaboda wa Jiji la Arusha.

Baadhi ya waendesha bodaboda wa Jiji la Arusha wakimsikiliza Mwigulu Nchemba(hayupo pichani) kwenye kikao chakukabidhi kadi za umiliki wa bodaboda,Jijini Arusha.

Read More

Watoto Wenye Mahitaji Maalum Washinda Medali

Hawa ni wawakilishi wa mashindano ya Olimpiki Maalum Kimataifa, Kulia ni Simon Oloije,katika ni Rehema Soingei na Elizabeth Kisaka,kutoka Arusha.

Watoto wenye mahitaji maalumu(ulemavu wa akili) 34 watunukiwa medari 32 baada yakuibika washindi katika mashindano  ya Olimpiki MaalumuTanzania ali maalufu kama (SOT) yaliyofanyika mapema Zanzibar.

Akiwatunuku medari hiyo kwa niaba ya Katibu Tawala Mkoa wa Arusha,Emmanuel Maundo amesema nijambo lakujivunia sana kwa mkoa wetu kuibuka washindi katika michezo mbalimbali ikiwemo mpira wa miguu na riadha,na kuweza kupata wawakilishi katika mashindano ya kimataifa.

“Ninafuraha sana kuona watoto wetu wenye ulemavu wa akili wameweza kuuwakilisha vizuri mkoa wetu katika mashindano haya, na wameweza kuonyesha kuwa hata wao wanaweza kufanya vizuri sana katika michezo mbalimbali.”alisema

Emmanuel Maundo(Mwakilishi wa Katibu Tawala Arusha-mwenye nguo Nyeupe)akiwa kwenye picha ya pamoja na watoto wenye ulemavu wa akili,wadau,walimu na wazazi,mbele ya ofisi ya ofisi ya Mkuu wa Mkoa Arusha.

 Amewasihi sana wazazi ambao bado wanaendela kuwaficha watoto kama hao waache mara moja kwani hata wao bado wana fursa kubwa katika jamii yetu,hivyo wanatakiwa kupewa nafasi kama ilivyo kwa watoto wengine.

Aidha, amezitaka halmashauri zote za mkoa wa Arusha kuhakikisha zinatenga bajeti maalumu yakuendesha michezo kwa watoto wenye ulemavu kama ilivyo kwa watoto wengine na kuhakikisha zinashiriki katika mashindao yajayo.

Serikali inatambua vizuri sana mahitaji ya kundi hili la watoto wenye mahitaji maalumu ndio maana ikatenga bajeti yakutosha mashuleni ili waweze kupata chakula chakutosha asubuhi na mchana.

Emmanuel  Maundo akikabidhi cheti cha chukrani kwa bwana,Yuzra Mushree kutoka Kampuni ya A and B Limited,waliotoa mchango wao mkubwa katika kufanikisha safari ya timu ya walemavu wa Akili.

Akiongezea zaidi,amesema ofisi ya mkuu wa Mkoa Arusha itaendelea kuwa bega kwa bega na timu hiyo nakutoa ushirikiano kila mara ili kuwasaidia watoto hao waweze kuendelea na michezo yao.

Pia mratibu wa SOT Bwana Antony Mushi, amesema timu ya watoto hao walemavu wa akili imeweza kuibuka na medari 6 za Dhahabu,12 za Fedha na 14 za Shaba nakufanikiwa kutoa watoto watatu ambao watashiriki mashindano yakimataifa yatakayofanyika Machi 2019,huko Abu Dhabi Uarabuni.

Amewashukuru wafadhili mbalimbali waliojitokeza katika kusaidia mahitaji mbalimbali ya timu hiyo hususani tiketi za mabasi kwenda Zanzabar na kurudi,vyakula na vifaa vya michezo.Amehimiza wasichoke kusaidia kwani bado uhitaji nimkubwa na kuomba na wafadhili wengine wajitokeze zaidi.

Afisa Michezo wa Mkoa Mwamvita Onoka, nae amesema kama mkoa atahakikisha mashindao hayo ya watoto wenye ulemevu wa akili yanafanyika kila mwaka kwa Mkoa wa Arusha.

Afisa Michezo Mkoa wa Arusha Mwamvuta Onoka akimvisha medali mmoja wa watoto wenye ulemeavu wa akili walioshiriki mashinda ya michezo mbalimbali,Zanzibar.

Amesema michezo kwa watoto hao nimuhimu sana kwa afya zao hivyo hamna budi kuyafanya kila mwaka badala yakusubiri kila baada ya miaka 3 au 4.

Olimpiki maalumu kwa Mkoa wa Arusha ilianza mwaka 1990 kwa mashindano hayo kufanyika hapa hapa Arusha na baadae yaliendelea katika mikoa mingine nchini.

Emmanuel Maundo akimvisha medali mmoja wa watoto walioshiriki mashindano ya Olimpiki Maalumu,Zanzibar.

Read More

BILIONI 2 ZATUMIKA KUBORESHA SEKTA YA AFYA

Baadhi ya mafundi wakiwa kazini kwenye ujenzi wa kituo cha afya Nduruma,wilayani Arusha.

Katika kutekeleza maelekezo ya uboreshaji  na  ukarabati wa vituo vya afya nchini, Mkoa wa Arusha amefanikiwa kuboresha vitua vya afya viwili kwa awamu ya kwanza.

Akitoa taarifa fupi ya maendeleo ya ujenzi wa vituo hivyo,Mganga mkuu wa Mkoa Dr.Vivian Timothy Wonanji, amesema mpaka sasa kwa mkoa wa Arusha zoezi hili linaendelea vizuri na kwakasi kubwa.

Awamu ya kwanza, Mkoa ulipata kiasi cha bilioni 1.4 kwa ujenzi wa vituo viwili vya afya,ambapo ni kituo cha afya cha Nduruma kilipata kiasi cha shilingi milioni 500 kwaajili ya ujenzi na milioni 200 kwaajili ya ununuzi wa vifaa na kituo cha afya cha Kambi ya Simba kimepata milioni 500 kwaajili ya ujenzi na milioni 200 za ununuzi wa vifaa.

Amesema kituo cha fya cha Nduruma kilichopo katika halmashauri ya Arusha kinaendelea na ujenzi wa majengo matano na mpaka sasa yapo katika hatua ya ukamilishaji,majengo hayo yakiwemo wodi ya wazazi na jengo la upasuaji.

Kituo cha pili ni Kambi ya Simba kilichopo katika Wilaya ya Monduli, ambapo mpaka sasa ujenzi unaendelea wa majengo nane yakiwa kwenye hatua ya upauwaji.

Aidha,amesema katika awamu ya pili ya ujenzi wa vituo vya afya, mkoa wa Arusha umeshaanza maandalizi yake kwa uundaji wa kamati mbalimbali zakusimamia shughuli nzima na kiasi cha shilingi bilioni 1.2 zimeshatolewa na benki ya dunia kwa ujenzi wa vituo vya afya 3 .

Wilaya ambazo zimepata fedha hizo ni, Wilaya ya Ngorongoro katika ujenzi wa kituo cha afya cha Sakala, Wilaya ya Monduli kituo cha afya cha Mto wa Mbu na Wilaya ya Longido ujenzi wa kituo cha afya cha Engarenaiobor,ambapo kila kituo kitapatiwa kiasi cha shilingi milioni 400.

Pia, serikali imetoa fedha za ukarabati wa vituo vya afya mkoani Arusha, kikiwemo kituo cha afya cha Murieti,kimepata kiasi cha milioni 700.

                                                                

Kituo vingine ni kituo cha afya cha Usa liver ambacho kimepata kiasi cha shilingi milioni 700 kwaajili ya ukarabati wa chumba cha upasuaji kwa wakinamama.

Kituo cha afya cha Ololiendeki wilayani Longido nacho kimepata kiasi cha milioni 700 kutoka serikalini.

 

Dokta Wonanji amesema, mpango huu wa ukarabati wa vituo vya afya kwa mkoa wa Arusha, awamu ya kwanza vituo  vya afya 2 vimeweza kunufaika, na awamu ya pili utakamilishwa kwa ukarabati wa vituo vya afya 6 na kupelekea mpango huu kukarabati vituo vya afya 8 kwa mkoa mzima wa Arusha.

Mpango huu wa ukarabati wa vituo vya afya upo katika awamu mbili,yakwanza ilianza rasmi Septemba,2017 na utakamilika Januari,2018,ambapo awamu ya pili umeanza Januari 2,2018 na utakamilika Aprili,2018.

Read More

HAWA NDIO WANAFUNZI WALICHAGULIWA KUJIUNGA NA KIDATO CHA KWANZA 2018

http://www.arusha.go.tz/announcement/waliochaguliwa-kujiunga-na-kidato-cha-kwanza-2018

Read More

Shule binafsi za Sekondari zatakiwa kufuata sheria ya elimu.

Katibu Tawala Msaidizi upande wa elimu akizungumza na waandishi wa habari(hawapo pichani)juu ya usimamizi wa sheria ya elimu kwa shule binafsi.

Shule zote binafsi za mkoa wa Arusha zimetakiwa kufuata sheria  ya elimu ya mwaka  2012 ya usimamizi wa upandaji wa madarasa  kwa wanafunzi wa shule hasa  za Sekondari.

Akitoa rai hiyo katibu tawala masaidizi upande wa elimu bwana Gift Kyando, amesema serikali  imeweka utaratibu wa upimaji wa wanafunzi kwa darasa la nne, darasa la saba,kidato cha pili na kidato cha nne.

“Hakuna utaratibu wakumpima mwanafunzi wa kidato cha tatu kwenda kidato cha nne kama inavyofanywa na baadhi ya shule binafsi kwa kuweka wastani wa alama za masomo kwa wanafunzi na ambae hata fikisha kiwango hicho hufukuzwa shule au kuamliwa kurudia kidato”.

Amesema serikali haitafumbia macho kwa shule yoyote itakayokiuka sheria hiyo ya elimu nakuwataka wakuu wote wa shule wanaoendesha shule zao kwa kukiuka utaratibu huo kuacha mara moja na pia amewasihi wazazi wote waendelee na maandalizi ya watoto wao wanaoingia kidato cha nne bila hofu yoyote.

Pia amesema serikali itaendelea kuzifuatilia shule zote za binafsi hasa zilizobainika kukiuka sheria hiyo ili kuhakikisha wanafunzi hawafukuzwi au kurudia madarasa bila utaratibu uliowekwa na serikali.

Amewataka wazazi wote ambao watoto wao watakataliwa kuendelea na masomo kwa kigezo cha kikosa wastani wa alama za shule husika, watoe taarifa haraka katika ofisi za elimu za  mkoa wa Arusha  kwa hatua zaidi.

Read More

Katibu Mkuu TAMISEMI Eng.Musa Iyombe ateta na watumishi wa umma wa mkoa wa Arusha.

Katibu Mkuu TAMISEMI,Eng.Musa Iyombe,akizungumza na katibu tawala mkoa Richard Kwitega(kushoto) na katibu tawala wilaya ya Arusha David Mwakiposi(kulia) baada ya kikao na watumishi wa mkoa wa Arusha.

Baadhi ya watumishi wa umma wa mkoa wa Arusha,waliohudhuria kikao cha Katibu Mkuu TAMISEMI,Eng. Musa Iyombe(hayupo pichani) katika ukumbi wa ofisi ya mkuu wa mkoa,jijini Arusha.

Read More

TIMU YA RIADHA YA TAIFA YAAGWA RASMI MKOANI ARUSHA

Katinu Tawala wa Mkoa wa Arusha Richard Kwitega,akiwa kwenye picha ya pamoja na timu ya riadha ya taifa, jijini Arusha.

Katibu Tawala wa Mkoa wa Arusha Richard Kwitega,akikabidhi fedha kwa kocha wa timu ya riadha ya Taifa alipokuwa akiiaga rasmi kwa ajiri ya safari ya London.

Timu ya riadha ya taifa imekabidhiwa kiasi cha shiling laki tano kutoka  ofisi ya mkuu wa mkoa wa Arusha kama mchango wakuiunga mkono timu hiyo na kuitakia kila la kheri katika mashindano ya dunia.

Akitoa zawadi hiyo katibu tawala wa mkoa wa Arusha Richard Kwitega amesema, mkoa umeguswa sana na juhudi zinazooneshwa na timu hiyo katika mashindano mbalimbali hivyo kupitia ofisi yake imetoa kiasi hicho ili kuwaunga mkono wanariadha hao.

“Ofisi ya mkoa imeona haitakuwa sahihi sana kuiacha timu hii iondoke hivi hivi bila yakuitakia kheri ya mafanikio katika mashindano hayo ya riadha ambayo niya dunia, wakati imeweka kambi mda wote katika mkoa huu”.

Amewahasa kuwa wanapotoka hapo wawe na mawazo ya ushindi tu na wakazingatie yale yote waliyofundishwa wakati wakiwa kambini na walimu wao.

Aidha, amewataka wanaobaki kambini waendelea na mazoezi kwa juhudi zaidi na wasife moyo kwani mashindano yoyote yanaitaji juhudi na nidhamu ya hali ya juu.

Akitoa salamu za shukrani mmoja wa washiriki wa timu ya taifa Alex Siumbu amesema anaamini wanaenda kushinda na si vinginevyo kwani wameweza kufanya mazoezi kwa mda mrefu na watanzingatia maelekezo yote waliyopewa na walimu wao.

Timu hiyo ya riadha yenye washiriki 8 inatarajiwa kuondoka jijini Arusha Julai 29 kuelekea Dar es Salaama kwa maandalizi yakuangwa kitaifa Julai 31 na kuanza safari yakuelekea London Uwingereza Agosti 1 kwenye mashindano ya dunia.

Baadhi ya wanariadha wa timu ya taifa ya riadha wakimsikiliza Katibu Tawala wa Mkoa wa Arusha( hayupo pichani) alipokuwa akitoa nasaha za kuwaaga rasmi.

Read More

MAANDALIZI YA NANE NANE JIJINI ARUSHA YAMEPAMBA MOTO.

Mkuu wa Mkoa wa Manyara Joel Bendera,akifunga kikao cha maandalizi ya sherehe za nane nane, katika viwanja vya maonyesho hayo,jijini Arusha.

Mkuu wa Mkoa wa Manyara Joel Bendera amesema maonyesha ya kilimo na mifugo, maarufu kama nane nane mwaka huu kwa kanda ya Kaskazini yataongoza kwa ubora kwa nchi nzima.

Aliyasema hayo alipokuwa akifunga kikao cha maandalizi ya sherehe hizo za nane nane kwa kanda ya Kaskazini ambayo yanajumuisha mikoa mitatu ya Arusha,Manyara na Kilimanjaro.

Amesema kwa Serikali hii ya awamu ya tano niwajibu wakila mtu kufanya kazi kwa bidii nakuacha kufanyakazi kwa mazoea, ili kila mipango iliyowekwa katika maandalizi hayo yafanikiwe na kanda hii kushika nafasi ya kwanza nakua mfano kwa nchi nzima.

Akisisitiza zaidi Mkuu wa Mkoa wa Arusha Mrisho Gambo ameziagiza TANESCO na AUWSA kuhakikisha maji na umeme vinapatikana katika maeneo husika ya viwanja vya maonyesho ya nane nane ndani ya wiki moja.

Pia, Gambo amemwagiza mkuu wa wilaya ya Arusha  kuunda tume yakufuatilia taratibu za matumizi ya viwanja hivyo hasa katika wakati ambao sio wa maonyesho, ili kusaidia kupata taarifa kamili itakayosaidia kutoa hali halisi kabla ya makabidhiano baina ya taasisi iliyokuwa ikisimamia maonyesho hayo TASO na ofisi ya mkuu wa mkoa wa Arusha.

Kaimu mkuu wa mkoa wa Kilimanjaro Gelasius Byakanwa amesema pia katika kikao kijacho nivizuri taarifa ya mapato na matumizi kwa mwaka jana na mwaka huu isomwe kwa wajumbe ili waweze kupata hali halisi ya mapato hayo.

Maonyesho ya nane mwaka huu yataratibiwa na ofisi za makatibu tawala wa mikoa yote mitatu ya kanda ya Kaskazini kwa ushirikiano na Wizara ya Kilimo, Mifugo na Uvivu na mpaka sasa ni makampuni  33 tu ndio yamedhibitisha ishiriki katika maonyesho hayo, wananchi wote bado wanahamasishwa kushiriki kuanzia siku ya mwanzo hadi mwisho.

Wakuu wa Mikoa ya kanda ya Kaskazini wakikagua maandalizi ya maonyesho ya nane nane,jijini Arusha.

Baadhi ya viongozi wa kutoka mikoa ya kanda ya Kaskazini waliohudhuria kikao cha maandalizi ya maonyesho ya nane nane,jijini Arusha.

Read More

ZIARA YA MKUU WA MKOA KATIKA HALMASHAURI YA MERU

Read More

Tangazo la Utoaji wa Leseni za Biashara

Read More